د پاکستان لپاره د افغانستان نوی ټاکل شوی سفیر ډاکتر عمر زاخېلوال وايي، د استدلال په ډېپلوماسۍ به اسلام اباد قانع کړي چې د افغانستان سولې ملاتړ وکړي.
نوموړي د پنجشنبې پر ورځ له مشال راډيو سره په ځانګړې مرکه کې د باچا خان پوهنتون وروستي برید په اړه وویل، هېڅ افغان د باچا خان په نوم پر جوړ شوي پوهنتون د برید کولو فکر هم نشي کولای.
د جنورۍ پر ۲۰مه پر باچا خان پوهنتون تر حملې وروسته د پاکستان پوځ ویلي ول چې وسله وال له افغانستانه ورغلي ول. خو افغانستان دا تور بې بنسټه بللی وو.
