په کابل کې نن(شنبه) په یوه ځانمرګي بريد کې يو تن وژل شوی او دوه نور زخميان دي
د کورنیو چارو وزارت ویاند صدیق صدیقي مشال راډیو ته وویل چې دا ځانمرګی بريد نن سهار شاوخوا نهه نیمې بجې د طلايي ښار ګوټي په سیمه کې د کابل د انتخاباتو د ساحوي دفتر د رییس اول الرحمن رودوال په موټر شوې دی.
د صدیقي په خبره په دې پيښه کې د رودوال موټر چلوونکی وژل شوی او دوه ولسي وګړي یوه ښځه او یو نارینه زخميان شوي دي.
د دې پيښې ذمه واري چا نه ده منلي.
