د پاکستان امنیتي چارواکي ادعا کوي چې په خیبر ایجنسۍ کې یې د هوايي عملیاتو پرمهال لږ تر لږه ۱۵ مشکوک وسله وال وژلي دي.
د پاکستان د پوځ د عامه خبرتیا د ادارې لخوا مشال راډیو ته په استول شوې خبر پاڼه کې ویل شوي چې پوځ دا بمباري په تیرا کې کړې ده او د وسله والو پټنځایونه یې هم ویجاړ کړي دي.
د پاکستان پوځ له تیر څه مهاله په شمالي او جنوبي وزیرستان او همدارنګه په خیبر ایجنسۍ کې د وسله والو پرضد عملیات کوي چې په ترڅ کې یې دوی د ګڼ شمېر وسله والو د وژلو ادعا کوي.
کومې وسله والې ډلې په تېرا کې د حکومت لخوا د شوې بمبارۍ او د تلفاتو په اړه څه نه وايي ، په ازاد ډول هم د پوځ داعا سپیناوی ناشونی بریښي، ځکه چې پوځ ازادو خبریالانو ته سیمې ته د ورتګ اجازه نه ورکوي.
