د لاسرسي ځای

اصغر نواز : د زلزله ځپلو مرستې مو چټکې کړې دي


زلزله ځپلې له خپل نړېدلي کور سره

زلزله ځپلې له خپل نړېدلي کور سره

په پاکستان کې د قدرتي افتونو د انتظام اداره وايي چې د ژمي تر پيلېدو له مخه یې د زلزله ځپلو د مرستو لړی تيزه کړې ده.

اسلام اباد: په پاکستان کې د قدرتي افتونو د انتظام اداره وايي چې د ژمي تر پيلېدو له مخه یې د زلزله ځپلو د مرستو لړی تيزه کړې ده.

دا څرګندونې د دې ادارې مشر اصغر نواز د زلزلې ځپلو سيمو له دورې وروسته د جمعې په ورځ ناوخته په اسلام اباد کې خبري غونډې ته د وینا پر مهال کړې دي.

اصغر نواز وويل چې دوی د اغيزمنو سیمو لپاره د ټرکونو ، اته هيلي کاپټرو او پوځي الوتکو په وسیله د ضرورت توکي استوي.

اصغر نواز زیاته کړه چې په دې لېږل کېدونکو توکو کې خيمې ، برستڼي او د يخ ضد نمونيا واکسين هم شامل دي.

دا په داسې حال کې ده چې د پاکستان د موسمياتو محکمې د نومبر له لومړۍ نېټې یانې شنبې څخه په زلزله ځپلو سېمو کې د واورو اورېدو وړاندوېنه کړې ده.

د اکتوبر په ۲۶م په سيمه کې په راغلې زلزله کې تر ټولو زيات تاوانونه په خيبر پښتونخوا او افغانستان کې شوي وو.

د خیبر پښتونخوا د قدرتي افتونو د انتظام د ادارې په وینا ، په دې صوبه کې تر ټولو زیات شانګله او چترال ځپل شوي دي.

په زلزله کې ۳۹۶ کسان مړه شوي وو چې پکې ۲۷۲ په پاکستان او ۱۲۱ په افغانستان کې وو.

XS
SM
MD
LG