د بې پولو ډاکترانو سازمان اېم اېس اېف وايي، په کندوز کې د دوی پر روغتون تر امریکایۍ بمبارۍ وروسته په افغانستان کې خپلو فعالیتونو ته بیا کتنه کوي.
د اکتوبر پر درېیمه نېټه په دې بمبارۍ کې لږ تر لږه ۲۲ کسان ووژل شول چې پکې روغتیايي کارکوونکي هم شامل ول. هغه مهال په کندوز ښار کې د افغان ځواکونو او وسله والو تر منځ نښته روانه وه.
د بې پولو ډاکترانو سازمان وايي، تر اوسه د ۳۳ کسانو هېڅ درک نشته. د اېم اېس اېف عمومي مشر کرېسټوفر سټوکس تېره ورځ په کابل کې وویل، دا دردوونکې پېښه دوی اړباسي
((چې په عمومي ډول په افغانستان کې د خپل کار ارزونه وکړي او د خپلو کارکوونکو او ناروغانو د ساتنې او امنیت په اړه پر خپلو ژمنتیاو محتاطانه غور وکړي.))
ده زیاته کړه چې ((په راتلونکې کې په افغانستان کې د دوی کار د بشر دوستۍ نړیوال قانون د درناوي پر واضحې ډاډګېرنې او اطمینان منحصره دی.))
