د لاسرسي ځای

کابل - افغان حکومت وايي هره ډله چې غواړي په افغانستان کې ورانکارۍ وکړي، و به یې ځپي.

د ولسمشر یو ویاند ظفر هاشمي مشال راډیو ته وویل چې ولسمشر به د ټولو هغو ډلو پر ضد اقدام وکړي چې په افغانستان کې روانې چارې تخریبوي.

((هره ډله چې د افغانستان د خلکو پر ضد ګام پورته کړي. افغان ولسمشر به د وسله وال پوځ د اعلا قومندان په توګه هڅه وکړي چې دا ګواښ له منځه یوسي.))

ولسمشر غني د اګست پر ۱۹مه (د زمري ۲۸مه) د افغانستان د خپلواکۍ ورځې په مناسبت په وینا کې ویلي ول چې هېڅ کس پر افغانستان خپلې غوښتنې په زور نشي منلای او د هېواد ملي امنیتي ځواکونه د خاورې ساتنې لپاره پوره چمتووالی لري.

غني وویل، ګاونډیو هېوادونو اونړیوالې ټولنې ته یې هم په غوڅ ډول پیغام رسولی چې ((افغانستان د اسیا زړه دی او چې زړه ناکراره وي نو اسیا هېڅکله نشي ارامېدای)).

تر دې څو ورځې مخکې په کابل کې د بریدونو لړۍ په غبرګون ولسمشر پر پاکستان غږ (ږغ) کړی وو چې د وسله والو پټنځایونو او روزنځایونو د ختمولو په لړ کې دې خپلې وعدې عملي کړي.

غني زیاته کړې وه چې اوس هم وسله وال د پاکستان له خاورې افغانستان ته اوړي او بریدونه کوي.

افغان حکومت په داسې حال کې دا څرګندونې کوي چې پر پنجشنبه یا زیارت د ولسمشر لومړي مرستیال جنرال عبدالرشید دوستم مشال راډیو ته وویل، په فاریاب ولایت کې جګړه له پاکستانیو استخباراتو سره روانه ده. ده وویل، ((زموږ جګړه د غورماچ، بالامرغاب، قیصار او المار نه ده. زموږ جګړه د پاکستان له [استخباراتي ادارې] ای اېس ای سره ده.))

ده ادعا وکړه چې په فاریاب کې د ازبکستانیو وسله والو یو مشر قاري ذبیح او د پاکستانیو استخباراتو او پوځ یو لوړپوړی افسر هم وژل شوي دي.

هلته د پاکستان بهرنیو چارو د وزارت سېکرټر اعزاز احمد چودری په اسلام اباد کې د افغانستان سفیر جانان موسازي ته ویلي چې دا تورونه بې بنسټه دي چې ګواکې پاکستان د طالبانو ملاتړ کوي.

پر پنجشنبه یا زیارت د بهرنیو چارو وزارت په خبرپاڼه کې راغلي، هغه افغان سفیر ته وویل چی دا ډول تورونه د دواړو هېوادونو ترمنځ باور او اړیکو ته زیان رسوي.

چودری ویلی، پاکستان تل هڅه کړې چې د تورونو لګولو لوبه مخه ته یونسی. هغه همدا راز موسازي ته په ګډه پوله د درې پاکستانیو ملېشه سرتېرو پر وژل کې سخت احتجاج وکړ.

پاکستان په تېرو وختونو کې هم دا تورونه ناسم بللي چې ګواکې په افغانستان کې نیابتي جګړه پر مخ وړي.

تبصرې ښکاره کړئ

XS
SM
MD
LG