د لاسرسي ځای

د پاکستان پوځ وزیرستان کې د ۱۰ وسله والو وژلو ادعا کوي


بنو - د پاکستان پوځ ادعا کوي چې په شمالي وزیرستان کې یې ۱۰ مشکوک وسله وال وژلي او د هغوی پټنځایونه یې له منځه وړي دي.

د پوځ عامه اړیکو دفتر (ای اېس پي ار) وايي چې دا وسله وال پر چارشنبه یا شورو د شمالي وزیرستان په شوال کې په هوايي بمباریو کې وژل شوي دي.

خو ازادو سرچینو د پوځي چارواکو د دې ادعا پخلی نه دی کړی.

بل پلو د سیمې خلک وايي چې په دې بمباریو کې عام خلک وژل کېږي.

طالبانو ویلي چې په دې بمباریو کې دوی ته څه زیان نه دی رسېدلی.

د شمالي وزیرستان په بېلا بېلو سیمو کې له تېرو څو ورځو راهسې پاکستاني ځواکونه په هوايي بمباریو کې د وسله والو وژلو ادعاوې کوي خو ځايي خلک وايي چې په دې بمباریو کې دوی ته مرګ ژوبله اوړي.

د پاکستان پوځ د ۲۰۱۴م کال د جون له نیمايي راهیسې په شمالي وزیرستان کې د وسله والو پر ضد عملیات پیل کړي وو چې لا هم روان دي.

پوځ وايي، د وزیرستان شاوخوا ۹۰ فیصده سیمه یې له وسله والو پاکه کړې او له هغې سیمې لکونه بې کوره کړل شوي کسان اوس ورو ورو ځېنو سیمو ته ورستنېږي.

د شمالي وزیرستان زیاتره بېکوره کړل شوي په بنو او خوست او د خیبر پښتونخوا په نورو ولسوالیو یا ضلعو کې مېشت دي.

XS
SM
MD
LG