د ایران بهرنیو چارو وزیر جواد ظریف وايي ، له نړیوالو سره ایټمي تړون د برابرۍ پر بنیاد شوی دی.
جواد ظریف دا څرګندونې د سېشنبې په ورځ د ایران پارلماني غړو ته په وینا کې کړې دي.
د نړۍ له شپږو ځواکمنو هیوادونو سره د خبرو اترو پر مهال د ایراني پلاوي مشري کوونکي جواد ظریف د بنسټ پالو اکثریت لرونکي پارلمان ته وویل ، موږ دا نه وایو چې دا تړون یوازې د ایران په ګټه دی بلکې خبرې اتر تل د څه اخیستلو او څه ورکلو پر اساس کېږي.
د پارلمان غړو داسې یو پنځلس کسیزه کمېټۍ ټاکلو لپاره رایې اچولې دي چې د دې تړون د متن جاج واخلي. خو د کمېټۍ غړي تر اوسه نه دي ټاکل شوي.
په ایران کې د ریاستي چارو په اړه د ورستۍ پرېکړې واک لرونکي لوی مشر ایات الله علي خامنايي ویلي ، د دې به په کره توګه جاج اخیستل کېږي چې ایا د ایران ملي ګټې په پام کې نیول شوې دي او که نه.
