د بر دیر د کوهستان پر غرونو د تېرې ورځې تر باران او ږلۍ وروسته سېلاو راغلی چې پکې لږ تر لږه اووه کسان وژل شوي دي.
د کلکوټ تحصیلدار ریاض شاهد نن (جمعه) سهار مشال راډيو ته وویل، په وژل شویو کې د یوې کورنۍ پینځه ماشومان شامل دي.
د خېبر پښتونخوا په اسمبلۍ کې د بر دیر د کوهستان استازي ملک محمد علي وویل، په سېلاو کې د کلکوټ شاوخوا ۴۰ کیلومیټره سړک، کورونو او ودانیو ته زیان رسېدلی دی او دا چې حکومت د تګ راتګ لار پرانیستو هڅه کوي.
هلته ضلعي انتظامیې د بر دير په سیند کې د اوبو زیاتېدو خبرداری ورکړی دی.