د هلمند چارواکي وايي ،په موسى کلا ولسوالۍ کې يې د وسلوالو په يوه بريد کې د ١٧ پوليسو د وژل کېدو په اړه څېړنې پيل کړې دي.
چارواکي وايي ،وړمه شپه وسلوالو د موسى کلا ولسوالۍ په يوه ساحه کې د پوليسو پر يوه ماموريت بريد وکړ، چې د څوساعته جګړې له کبله ١٧ پوليس ووژل شول او ٢ تنه پکې ژوبل شول.
د هلمند د والي وياند عمر ځواک پرون مشال راډيو ته وويل چې ولايتي اداره دغه پېښه په سنجیدګی سره څېړي.
عمر ځواک وايي فکر نه کوي چې په دې حمله کې دې د داعش ډله چې ويل کېږي د هلمند په شمال کې په وروستيو کې فعاله شوې ده، لاس ولري.
په وروستيو کې د موسى کلا په ورڅېرمه ولسوالۍ سنګين کې د اوږدې مودې لپاره د افغان ځواکونو او وسلوالو طالبانو ترمنځ جګړې شوې دي.