د افغانستان د کورنیو چارو وزیر وایي چې په دې ورستیو کې د پولیسو تلفات زیات شوي او د دغو تلفاتو د مخنیوي لپاره جدي هڅې کوي.
نورالحق علومي دا خبرې نن (شنبه) د خپل سل ورځني کاري پروګرام د تشریح پرمهال وکړې.
که څه هم د کورنیو چارو وزیر د پولیسو د وژلو زیاتېدو علت په اړه څه ونه ویل خو تردې وړاندې د دې وزارت ویاند ویلي چې د پولیسو په لیکو کې د تلفاتو د لوړېدلو علت د بهرنیو ځواکونو نه افغان امنیتي ځواکونو ته د امنیت بشپړ سپارل دي.
همدارنګه په افغانستان کې د امریکايي ځواکونو لوی قوماندان جنرال جان کمپبل هم په خپلو تازه څرګندونو کې ویلي چې د افغان امنیتي ځواکونو په ځانګړي ډول د پولیسو تلفات زیات شوي دي.
