د لاسرسي ځای

ننګرهار : د دره نور په شېمول کلي کې د چت پرېوتو ۱۰ کسان وژلي


فایل فوټو

فایل فوټو

د افغانستان په ننګرهار ولایت کې د قدرتي افتونو له وجې د یوې کورنۍ لس تنه وژل شوې دي.

د ننګرهار ولایت مطبوعاتي مسئول احمد ضیا عبدالزي نن مشال راډیو ته وویل چې تېره شپه د دره نور ولسوالۍ اړوند په ( شېمول ) سیمه کې د قدرتي افتونو له امله د یوې غونډۍ یوه څنډه راخويدلې چې له وجې یې د یوې کورنۍ لس تنه وژل شوي او یو تن يې ژوبل کړی دی.

احمد ضیا عبدالزی وایي چې په وژلو شویو کې ماشومان او مېرمنې هم شامل دي.

د دره نور ولسوالۍ اوسیدونکي وايي له تیرو څو ورځو راهیسې په سیمه کې بارانونه وریدل او له پرونه راهیسې هلته د واورو ورښت هم پیل شوی.

ځايي اوسیدونکي له حکومته غوښتنه کوي چې یادې سیمې ته دې مرستندویه ډلې ورواستوي، ځکه چې د دوی په وینا د ورښتونو له کبله د نورو کورونو د راپریوتلو ویره هم لیدل کیږي.

د هندوکش غرونو په لمن کې پرته دره نور ولسوالي که په قدرتي حسن ښایسته ده ، خو خلک یې ناداره دي او لا هم پکې کورونه په پاخه او اساسي ډول نه دي جوړ شوي، داسې پېښې په یاده ولسوالۍ کې تر دې وړاندې هم شوي دي.

XS
SM
MD
LG