په داسې حال کې چې د اوکرایین په ختیځ کې جګړو زور اخیستی، د فرانسې ولسمشر فرانسوا اولاند، د جرمني چانسلرې انګېلا مېرکل او د اوکرایین ولسمشر پیترو پوروشینکو د اوکراییني ځواکونو او روس پلوو بېلتونپالو ترمینځ د سمدستي اوربند غوښتنه کړې ده.
دا غوښتنه د اوکرایین سولې خبرو له ناکامۍ یوه ورځ وروسته کېږي. د فرانسې جمهوري ریاست وايي، درې واړو مشرانو چې پر ټیلیفون يي خبرې کولې، په اوکرایین کې د جګړې ختمولو په موخه د مینسک خبرو پر ناکامۍ خپګان ښودلی.
نښتو په وروستیو څو ورځو کې په پتېره دېبالڅیوي Debaltseve ښار کې زښته زور اخیستی دی چې د حکومت په ولکه کې دی او روسیې پلوه بېلتونپالي هلته د دولتي ځواکونو د کلابندولو هڅه کوي.
د اوکراین پوځ پرون «اتوار ورځ»وویل چې دیارلس تنه سرتېري یې په تېرو ۲۴ ساعتونو کې وژل شوي. حکومتي چارواکي او روس پلوه بېلتونپالې سرچینې د لږترلږه اولس ولسيوګړو د مړینې خبر هم ورکړی دی.