د خیبر پښتونخوا د صحت د محکمې چارواکي وايي د اتوار او ګل په ورځو به په پېښور ښار او شاوخوا سیمو کې اوه نیم لکه ماشومانو ته د پولیو پرضد څاڅکي ورکول کیږي.
دا په داسې حال کې ده چې نړۍ کې پاکستان او په پاکستان کې د خیبر پښتونخوا صوبه او قبایلي سیمې پولیو تر ټولو زیاتې ځپلي دي. په پاکستان کې سږ کال د پولیو نږدې دوه سوه او شپیته پېښې څارل شوي چې اکثره یې په پښتونخوا او قبایلي سیمو کې مخې ته راغلي دي.
د وسله والو له ویرې او د خرابې امنیتي وضعې له کبله د پولیو په ټیمونو وخت په وخت بریدونه هم ترسره کیږي، خو د خیبر پښتونخوا چارواکي وايي د پولیو د ټیمونو د حفاظت لپاره یې اوه نیم زره د پولیسو سرتیري هم په کار ګومارلي دي.
بلخوا په بلوچستان کې د صحت د محکمې چارواکي خبر ورکوي چې د پولیو يا ګوزڼ له ناروغۍ څخه دوه نور ماشومان متاثره شوي دي، چې ورسره په روان کال کې په بلوچستان کې د پولیو له وجې د متاثره شويو ماشومانو شمېر څوارلسو ته پورته شوه.