پېښور: د خیبر پښتونخوا د چارسدې په شبقدر کې د نجونو یو بل ښوونځی [سکول] په بارودو الوزل شوی دی. دا پېښه تېره شپه په ګوډو نومي کلي کې شوې ده.
تر اوسه دا نه ده مالومه چې دا کار چا کړی دی. د ياد ښوونځي څوکيدار رضا علي خان د شنبې په ورځ مشال راډيو ته وویل چې پر نیمه شپه درې کسان ورغلي او دی له ښوونځي اېستلی او بیا یې چاودنه کړېده.
د دې پېښې له رامنځ ته کېدو سره د چارسدې په شبقدر کې د وسله والو لخوا د ړنګ شوو تعلیمي ادارو شمیر ۳۱ ته ورسیدی.
په خیبر پښتونخوا او قبایلي سیمو کې د ښوونځیو د ورانولو لړۍ له تېرو څو کلونو راهسې روانه ده چې تر اوسه په سوونو ښوونځي ړنګ شوي دي.
