امریکا د افغانستان د اورګاډي په ګډون د نړۍ د شپږو پروژو ستاینه کړېده.
د اورګاډي دا پټلۍ ۷۵ کلومیټره اوږده ده او د افغانستان شمالي ښار مزار شریف له ازبکستان سره نښلوي.
دا په ۲۰۱۱ز کال کې د اسیا د پرمختګ بانک په مرسته سر ته رسېدلې وه چې ۱۷۰ میلیونه امریکايي ډالر په لګېدلي ول.
د امریکا د خزانې وزارت ویلي چې دې اورګاډي ۱۲۰۰ کسانو ته روزګار ورکړی، د سیمه ییز اقتصاد په وده کې یې رول لوبولی، د شیانو قېمتونو یې ټیټ کړي او غربت یې کم کړی دی.
په نورو پروژو کې په یمن کې د صحت د بنیادي اسانتیاوو او اوبو د خدمتونو پروژه، په بنګله دېش کې د وړې کچې له کروندګرو سره د مالي مرستو پروژه او په برازیل کې د هغو ځوانانو د روزنې پروژه شامله ده چې مالي امدن یې کم دی.
