د افغانستان ولسمشر حامد کرزي د لشکر طیبه په نوم پاکستانۍ وسلواله ډله تورنه کړې ده چې د تېرې جمعې پر ورځ یې په هرات کې د هند پر سفارت برید کې لاس درلود.
د هند ټېليویژني شبکې هېډلاینز ټوډې « headlines today » ته ولسمشر حامد کرزي ویلي، د هغو معلومات له مخې چې یوه برخه یې د یوې مغربي استخباراتي ادارې له خوا ورته ورکړل شوې ده، په هرات کې برید لشکر طیبه ډلې ترسره کړی دی. خو یادې ډلې لا په دې اړه څه نه دي ویلي.