د لاسرسي ځای

امریکا بیا له پاکستانه د حقاني ډلې د ځپلو غوښتنه کړې ده


جلال الدین حقاني ( فایل فوټو )

جلال الدین حقاني ( فایل فوټو )

د ډان ورځپاڼې پر ويب پاڼه خپرې شوې ليکنې کې راغلي، يو وخت و چې امريکا به له پاکستانه پرله پسې غوښتنې کولې چې په شمالي وزيرستان کې د حقاني ډلې پر ضد عمليات وکړي. خو د وخت له تېرېدو سره امريکا وپوهېده چې پاکستان يې پر دغو غوښتنو ځان کوڼ اچولی دی، او ځکه نو د دغو مطالبو له تکرارولو او پر پاکستان د لا زيات فشار راوړلو پاليسي يې پرېښوده.

د دې پر ځای امريکا زياته توجه له افغان طالبانو سره د سولې او جوړجاړۍ پر خبرو مرکوز کړه.

خو د ليکنې تر مخه، د امريکا مرستيال خارجه وزير ويليم برنز پاکستان ته د خپل وروستي سفر پر مهال د دې هېواد حکومت ته يوارې بيا د حقاني ډلې د ځپلو په هدف د اقداماتو کولو خبره وکړه.

ليکنه زياتوي، د دې وجه ممکن دا وي چې په افغانستان کې د امنيتي او حکومتي چارو د انتقال مسئله يوه حساس پړاو ته داخله شوې، او دا چې امريکا اندېښمنه ده چې هسې نه حقاني ډله د دغې مهمې پروسې پر وړاندې د يوه خطر په توګه ودريږي.

که خبره هم داسې وه، نو د پاکستان حکومت، چې د ليکنې تر مخه، د حقاني ډلې تر شا ولاړ دی، به يوارې بيا په دغه معامله کې تر نويو فشارونو لاندې راشي.

خو ليکنه کاږي، چيرته چې خطر موجود وي، ورڅخه د وتلو يوه لاره هم اکثره وخت شتون لري.

پاکستان په تېرو وختونو کې په يوه او يا هم بله پلمه، د حقاني ډلې پر ضد د اقدام کولو د امريکا فشارونه يوې خوا ته واچول. پر يوې مسئلې د سترګو پټولو همدا پاليسي ده چې له پولې اخوا، د افغانستان په جګړه کې ښکېلو خواوو هم، کله لږه او کله ډېره کارولې ده.

په ليکنه کې وړاندې راغلي، د پاکستان سيکوريټي اسټيبلشمنټ بايد اندېښمن واوسي چې که د تحريک طالبان پاکستان مشرتابه افغانستان ته ولاړه شي، نو عين ممکن ده چې له دغه ځايه د مرستو په تر لاسه کولو د پاکستان پر ضد جګړه پيل کړي.

په دغه صورت کې به د پاکستان قبايلي سيمې لا ډېرې ناارامې شي، چې اغېزې به يې هرو مرو د دې هېواد پر نورو برخو هم وشي.

د ليکنې په پای کې ويل شوي، د پولې دواړو خواوو ته د ترهګرۍ پر کېدونکيو پېښو او د دې پر لاملونو بايد له نوي سره غور وشي. پاليسي جوړونکي بايد پر دې پوه وي چې پر قبايلي سيمو ډرون بريدونه کېدل څه وخت هم بيرته پيلېدای شي.
XS
SM
MD
LG