د ولسمشرۍ نوماند زلمي رسول مطبوعاتي دفتر د یکشنبې پر ورځ د انتخاباتو له خپلواک کميسيونه غوښتي چې د خلکو له رايو سره د معاملې کېدلو مخه دې ونیسي.
بلخوا د و لسمشرۍ نوماند عبدالرب رسول سياف مطبوعاتي دفتر بيا تور پورې کړی چې حکومتي چارواکو او د انتخاباتو خپلواک کميسيون په پراخې درغلۍ سره د نه بخښلو جرم کړى دى.
د سیاف له خوا پرون خپره شوې خبرپاڼه لیکي چې د انتخاباتو خپلواک کميسيون د جعلي او سمو رایو تر بېلولو وړاندې لومړۍ یوه برخه نتیجې اعلان کړې دي.
د ولسمشرۍ بل کانديد ډاکټر اشرف غني احمدزي هم د یکشنبې په ورځ هیله ښودلې چې ډېر ژر به جعلي رایې او سمې رایې سره بېلې شي چې د هغه په وینا ، ولس خبر شي چې دا کار له قانون سره سم شوی دی.
دا له هغه وروسته ده چې د افغانستان د انتخاباتو خپلواک کمیسیون د یکشنبې په ورځ له شپږویشت ولایتونو څخه د لس فصیده رایو نتیجې اعلان کړې.
د دې نتیجو له مخې عبدالله عبدالله پر لومړي، ډاکټر اشرف غني احمدزی پر دویم او زلمی رسول پر درېیم نمبر دی.
خو د انتخاباتو د خپلواک کمېیسون مشر احمد یوسف نورستاني وویل چې راتلونکې نتیجې په اساني سره په دې کې بدلون راوستلای شي چې څوک وړاندې او څوک شاته دی.
په افغان ټولټاکنو کې د درغلیو وروستۍ موندنې نن اعلانېږي
ټاکل شوې د افغانستان د شفافو انتخاباتو ټولنه د ولسمشرۍ د انتخاباتو پر مهال د درغلیو په اړه خپلې وروستۍ موندني نن اعلان کړي .
د دې ټولني مشر محمد نعیم ایوب زاده د یکشنبې په ورځ ناوخته مشال راډیو ته وویل چې تمه لري د انتخاباتي شکایتونو د اوریدو کمیسیون د بې طرفې په ساتلو سره ټولې هغه درغلې ارزوي چې ددوی په راپور کې اشاره ورته شوې.
محمد نعیم ایوب زاده وویل:
'موږ نن يوه اعلاميه خپروو چې د درغليو ، سرغړونو او د انتخاباتو په ورځ د نورو ستونزو په اړه يو بشپړ تصوير د رسنيو له لارې خلکو ته وړاندې کوو'
د افغانستان د انتخاباتي شکایتونو د اوریدو کمیسیون د یکشنبه په ورځ وویل چې (اتلس سوه دوه نوي) شکایتونه په رسمي ډول له دوی سره ثبت دي چې په دې کې ۸۷۰ په لومړۍ درجه کې راځي.