په تېرو څلریشتو ساعتونو کې په پکتیکا، میدان وردګو او غزني ولایتونو کې لس تنه وسلوال وژل شوي او شپږ نور ټپیان شوي دي.
د تندر قول اردو څخه د چهارشنبې په ورځ مشال راډیو ته په استول شوې خبرپاڼه کې ویل شوي، چې د پکتیکا ولایت د برمل ولسوالۍ په مربوطاتو کې د ملي اردو د درندو وسلو په برید کې اته وسلوال وژل شوي او څلور نور ټپیان شوي دي.
همدارنګه د میدان وردګو ولایت د دایمرداد ولسوالۍ په مربوطاتو ګې یو تن وسلوال د ملي اردو او ملي پولیسو پر ګډې ګزمې د برید پر مهال وژل شوی دی او یو تن وسلوال هم د غزني ولایت د اجیرستان ولسوالۍ په مربوطاتو کې د ملي اردو په عملیاتو کې وژل شوی دی.
سرچینه زیاتوي، په دې عملیاتو کې د وسلوالو په ډزو کې یوه تنه میرمن هم وژل شوې ده.
د تندر قول اردو مطبوعاتي دفتر د پکتیا او خوست ولایتونو په مربوطاتو کې هم د سړک د غاړې د یو شمېر ماینونو د شنډولو خبر ورکړی دی.