افغان چارواکي وايي، د تېرې چارشنبې پر ورځ په لوګر ولایت کې په یوه بایسېکل کې د ایښودل شوي بم چاودنې لږ تر لږه شپږ کسان وژلي دي.
د ولایتي حکومت ویاند دین محمد دروېش پرون وویل، بایسېکل د ولایت په مرکز پل عالم کې د پولیسو له یوې پوستې سره درول شوی وو.
د ده په خبره، په چاودنه کې ۱۳ کسان ژوبل شوي دي. چاودنه د خلکو د ګڼې ګوڼې په ځای کې شوې ده.
د یوه بل خبر تر مخه، په کابل کې امریکايي سفارت ویلي دي، دوه توغندي پرون سهار د سفارت ودانۍ دننه لګېدلي دي. د سفارت په خبره، په پېښه کې مرګ ژوبله نه ده شوې. وسله والو طالبانو د راکټونو ورولو پړه منلې ده.
