د لاسرسي ځای

'اوکراین به له اروپايي ټولنې سره تړون ژر لاسلیک کړي'


د اوکراین د حکومت یوه جګپوړي مقام پرون پنجشنبې پر ورځ ډاډ ورکړ چې؛ هېواد به یې له اروپايي ټولنې سره د شراکت تړون ډېر ژر لاسلیک کړي.

د اوکراین د حکومت یوه جګپوړي مقام پرون پنجشنبې پر ورځ ډاډ ورکړ چې؛ هېواد به یې له اروپايي ټولنې سره د شراکت تړون ډېر ژر لاسلیک کړي.


له اروپايي ټولنې سره د اوکراین د ګډون لانجمنه موافقه چې د دې هېواد ولسمشر یې له لاسلیک څخه ډډه کړې په اوکراین کې د خلکو پراخ اعتراضونه وپارول.

په عین حال کې د اروپايي ټولنې چارواکو په وروستیو څو ورځو کې اوکراین ته ګڼ سفرونه کړي او داسې ښکاري چې د کورنیو او نړیوالو فشارونو په نتیجه کې حکومت د دې تړون لاسلیک ته تیار شوی دی.

د اوکراین مرستیال صدراعظم وايي، حکومت به ډېر ژر له اروپايي ټولنې سره د همکارۍ تړون لاسلیک کړي.

سېرهي اربوزوف Serhiy Arbuzov د اروپايي ټولنې د پراختیا له کمېشنر ستیفن فیولې سره په بروکسل کې له پرونۍ کتنې وروسته دا څرګندونې وکړې:

"زه د اوکراین خلکو ته ډاډ ورکوم چې؛ خبرې روانې دي. اوکراین به خپلو ملي ستراتیژیکو ګټو ته په پام سره ډېر ژر د همکارۍ د دې تړون د لاسلیک تاریخې شېبې ته ورسېږي."

خو اربوزوف زیاته کړه، ځیني تجارتي مسایل شته چې بروکسل او کیېف د تړون له لاسلیکولو مخکې باید بحث پرې وکړي.

دواړو مشرانو ټینګاروکړ چې؛ په خبرو اترو کې د اروپايي ټولنې له خوا له اوکراین سره د مالي مرستې په اړه هېڅ راز بحث نه دی شوی. فیولې په دې اړه وویل:

"موږ د مشخصو ارقامو په اړه خبرې نه دي کړي. موږ لومړی باید پر دې بحث وکړو چې د اوکراین اړتیاوې او زموږ ژمنې څه دي او د شراکت موافقه به د کوم مهالوېش له مخې عملي کېږي او بیا له هغه بهیر سره خپل ملاتړ ته ارتباط ورکولای شو."

ولسمشر ویکتوریاناکوویچ تېره میاشت په وروستۍ شېبه کې د دې تړون له لاسلیکولو ډډه وکړه چې؛ په نتیجه کې یې اوکراین له روان بحران او د اروپايي ټولنې د پلویانو له اعتراضونو سره مخامخ شو.

د اروپايي ټولنې د بهرنۍ پالیسۍ مشرې کاترین اشټن د سې شنبې او چارشنبې په ورځو په کییف کې له ولسمشر یاناکوویچ سره ترکتنې وروسته تېره ورځ ازادۍ راډیو ته وویل، هغو اندېښنو چې ولسمشر ویکتور یاناکوویچ له دې سره د خبرو په ترڅ کې یاد کړل، ښايي له اروپايي ټولنې سره د همکارۍ د موافقې لاسلیک ناممکن کړی وي.

په همدې حال کې د روسیې ولسمشر ولادیمیرپوتین پرون په خپله یوه وینا کې، د روسیې په مشرۍ له ګمرکې اتحادیې سره د اوکراین د ګډون په صورت کې د دې هېواد لپاره اقتصادي امتیازونه روښانه کړل، خو ویې ویل، دا د کییف خپل انتخاب دی چې له دې اتحادیې سره یوځای کېږي کنه.

زرګونه مظاهره چیانو پرون بیاهم په پلازمېنه کیېف کې د دولتي ودانیو نیولو ته دوام ورکړ. د چارشنبې په ورځ پولیسو له واټونو او چوکونو د اعتراض کوونکو د اېستلو ناکامه هڅه وکړه.

مظاهره چیان د اروپا او اوکراین ترمینځ د همکارۍ د موافقې له لاسلیکولو څخه ډډه کول پر کییف د مسکو د فشار نتیجه بولي او وایي روسیه غواړي چې کیېف دا تړون له مسکو سره لاسلیک کړي.

له بلې خوا اپوزیسیون د ولسمشر یاناکوویچ د ملي ډیالوګ غوښتنه رد کړې او ټینګار یې کړی چې حکومت باید استعفا ورکړي.

د بشري حقونو د څار سازمان هیومن رایټس واچ چې مرکز یې په نیویارک کې دی پرون په یوه بیان کې له مظاهره چیانو او چارواکو غوښتنه وکړه چې له تشدد څخه ډډه وکړي.
XS
SM
MD
LG