د لاسرسي ځای

لواړګی - د قبایلي سیمو له طبیعي ناورینونو سره د مبارزي اداره اېف ډي اېم اې وايي، د خیبر له تیرا میدانه د بې کوره شویو کورنیو خپلو کورونو ته بیرته ستنېدل به د اکتوبر له ۲۲مې نېټې بیا پیل شي.


د ادارې چارواکي وايي، د تیرا میدان خلک به د کواټ د جرمې له مرکز او د کورمې له نیو دراني کیمپه روانول کېږي.

د دوی په خبره، د کواټ له جرمې به د شلوبر او ادم خېل قبیلو خلک د اکتوبر له ۲۲مې تر ۲۷مې، ملک دین خېل او زخه خېل به له ۲۸م اکتوبر تر لومړي نومبره او چې کوم کسان پاتې وي هغه به د نومبر له دویمې تر پینځمې پورې خپلو سیمو ته واستول شي.

د کورمې اېجنسۍ له نیو دراني کیمپه به د بر قمبر خېلو قبیله د اکتوبر له ۲۲مې تر د نومبر پینځمې تیرا میدان ته واپس واستول شي.

له طبیعي ناورینونو سره د مبارزې ادارې مرستیال مشر فرمان خلجي له مشال راډیو سره د خبرو پر وخت وویل چې د تیرا میدان د پاتې کډوالو بیرته استولو دویم پړاو به د ۲۰۱۴ز کال د مارچ په میاشت کې پیلېږي.

ده وویل، هرې کورنۍ ته به ۲۵۰۰۰ کلدارې هم ورکوي او ورسره به خواړه، دوا ګاني او واکسینونه هم ورکوي.

د ده په خبره، تر اوسه دوی شا و خوا ۶۳۰۰ کورنۍ بیرته تیرا میدان ته استولې دي.

د یادونې وړ ده چې د ۲۰۱۳ز کال د فبرورۍ په میاشت کې د حکومت پلوه انصار الاسلام وسله والې ډلې او د تحریک طالبان پاکستان وسله والو تر منځ د نښتو له کبله ځايي خلکو تیرا میدان پریښی وو او کډوال شوي ول.

خو بیا پاکستاني پوځ عملیات وکړل او سیمه یې له وسله والو پاکه کړه.
XS
SM
MD
LG