د افغانستان د کورنیو چارو وزارت په کابل کې د قابل بای په سیمه کې یو ځانمرګی برید شوی دی خو نور جزیات یې لا نه دي په ډاګه کړي.
د کورنیو چارو وزارت ویاند صدیق صدیقي شیبه مخکې مشال راډیو ته وویل، چې تر اوسه د دې حملې په اړه پوره جزیات نه لري.
د مشال راډیو د خبریال د خبر له مخه چې دا ځانمرګی برید د یوه موټربم په واسطه شوی او وروسته په سیمه کې د ډزو غږونه هم اوریدل شوي دي.
ویل کيږي، چې دا پیښه د مازیګر د پنځو بجو په شاوخوا کې د ګرین ویلیج کېمپ سره نژدې شوې ده.
د کابل د امنیه قومندان جنرال ظاهر ظاهر خبریالانو ته وویل، چې څلور تنه ولسي وګړي ټپیان دي او د بهرنیانو د مرګ ژوبلې په اړه به وروسته له رسنیو سره معلومات شریک کړي.
د ښاغلي ظاهر په خبره دا حمله د نوموړي کمپ مخې ته د بهرنیو ځواکونو یوه ولاړ موټر ته نږدې شوې ده.
د دې برید مسولیت وسلوالو طالبانو په غاړه اخیستی دی.