د لاسرسي ځای

په سوات کې ډینګي تبې سلګونه ځپلي دي


د خیبر پښتونخوا په سوات کې ډینګي تبې ګڼ شمېر کسان ناروغه کړي دي.

د سوات سیدو روغتون انتظامي مشران وايي، تر اوسه یې ۱۲۵ کسان داخل کړي دي او دا شمېر په زیاتېدو دی.

په روغتون کې بسترو مریضانو مشال راډیو ته وویل، په وارډونو کې ځای نه شته. د دوی په خبره، له بل ځایه یې په کرایه کټونه راوړي دي او مریضان یې په کې اچولي دي.

ناروغان ګیله من دي چې ډاکتران هم خپل کار په سمه توګه نه کوي او ټیسټونه هم په شخصي لېبارټریو کې کوي.

په روغتون کې یو شمېر کسان تر شنه اسمان لاندې پراته دي.

ډېر اغېزمن شوي کسان په روغتون کې د درملنې اسانتیاو نشتوالي له کبله یا خو کورونو ته ځي او یا هم په شخصي روغتونونو کې خپله درملنه کوي.

د سیدو روغتون ویاند ډاکتر شاه دوران وايي، دوی یو وارډ مریضانو ته مخصوص کړی دی چې په کې د ښځو او سړیو له پاره ۸۵ کټونه دي. دی وايي، له دوی سره یوازې د ۳۰۰ کسانو له پاره د ټیسټ انتظام وو. دی وايي، له دوی سره دومره ځای نه شته ځکه خو خلک په خپله د خپلو مریضانو له پاره د کټونو انتظام کوي.

د سوات قامي اسمبلۍ غړي سلیم الرحمان ویلي، دوی د ډینګي ناروغانو امداد او درملنې له پاره هلې ځلې پیل کړې دي او په روغتون کې ورته بل وارډ جوړوي او د ټیسټونو انتظام کوي.
XS
SM
MD
LG