د لاسرسي ځای

وسلوالو د يوسف خيلو ولسوالۍ جامع جومات ته هغه مهال لاسي بمونه ورګوزار کړل، چې نږدې دوه سوه لمونځ کوونکي د تراویحو په لمانځه ولاړ وو،

د پکتیکا ولایت په یوسف خیلو ولسوالۍ کې وسلوالو په جامع جومات کې د تراوېح د لمانځه پر مهال پر لمونځ کوونکو لاسي بمونه غورځولی ، چې له کبله يې نهه تنه ټپیان شوي دي، بل لوري ته د یاد ولایت د یحیا خیلو په ولسوالۍ کې د افغان ځواکونو په کمین کې هغه وسلوال وژل شوی، چې په سیمه ییزو پولیسو کې يې خپل نهه ملګري وژلي ول.


د پکتيکا د ولايت مقام مطبوعاتي دفتر مشال راډیو ته د یوې استول شوې خبر پاڼې له لارې د نوموړي ولایت د ملي امنيت رياست د مسؤولینو په حواله وايي، چې وړمه شپه د وسلوالو يوې اوه کسيزې ډلې د يوسف خيلو ولسوالۍ جامع جومات ته هغه مهال لاسي بمونه ورګوزار کړل، چې نږدې دوه سوه لمونځ کوونکي د تراویحو په لمانځه ولاړ وو، چې له کبله يې نهه تنه لمونځ کوونکي ټپیان شول او جومات هم څه نا څه زیانمن شو.

د پکتیکا د ملي امنیت اداره وايي، چې د دوی د مالوماتو پر بنسټ جومات سره نږدې د دوی د یو کارمند کور وو، چې وروسته یاد وسلوال د نوموړي کارمند تر بريد لاندې راغلل، په دې موقع کې په سیمه کې د امنیتي ادارو سرتیري د نښتې سیمې ته ورسیدل، چې د لنډې جګړې په پایله کې د دولت د وسلوالو مخالفينو دوه قوماندانان د بازګل او قاري خليل په نومونو ووژل شول او پنځه نور تپيان شول، د سرچينې په خبره په مسجد کې ټپيان شوي ولسي وګړي د درملنې په موخه روغتون ته لیږدول شوي دي.

د يو بل خبر له مخې وړمه شپه د پکتیکا ولایت د یحیا خیلو ولسوالۍ په یحیا خیلو کلي کې افغان امنیتي ځواکونو د يوه کمين په ترڅ کې د اسدالله په نوم هغه وسلوال وواژه، چې يو کال وړاندې یې په همدې کلي کې خپل نهه تنه ملګري چې ده سره يې په سيمه ييزو پوليسو کې دندې درلودې، په خوب ويده په ډزو وژلي ول او له يو رینجر موټر او يو شمير مهماتو سره د دولت له وسلوالو مخالفینو سره یو ځای شوی وو.

له هغې پيښې وروسته د ولسوالۍ د اوسیدونکو له خوا د ده کور وسوځول شو او له کلي شړلی اعلان شو، د همدې پریکړې پر بنسټ د یحیا خیلو اوسیدونکو اجازه نده ورکړې، چې د نوموړي مړی په خپله پلرنۍ هدیره یحیا خیلو کې خاورو ته وسپارل شي.

تر اوسه په مشخص ډول د یادو دوو پيښو په اړه کومې وسلوالې ډلې رسنیو ته څه نه دي ویلي.

د یادونې وړ ده په دې وروستیو کې د یو شمیر نورو سیمو په شان د افغانستان په سویل ختیزو ولایتونو کې امنیتي پیښې زیاتې شوي، دولت او د وسلوالو مخالفینو خوا يې رسنیو ته د خپلو بریاوو په اړه رپوټونه ورکوي، خو د یو شمیر ستونزو له کبله د رسنیو استازیو ته ګرانه ده، مالومه کړي، چې د جګړې د ښکیلو خواوو د لاسته راوړنو او تلفاتو رښتیني ارقام څه ډول دي؟؟
XS
SM
MD
LG