د پاکستان وزیراعظم میانوازشریف د بلوچستان مرکز کوټې ته د خپل سفر پر مهال وویل چې ؛له دې وروسته به د ترهګرۍ يوه پېښه هم برداشت نه کړي؛. د پاکستان تر ټولو ښه پوليس آفیسران به دې ښار ته ورکوي. او هر څه وسايل چې دوی يې وغواړي، وربه يې کړي... له دې سره د بلوچستان وزیراعلی ډاکټر مالک بلوڅ هم ويلي ؛ریاست به د ترهګرۍ مخه په هر صورت نيسي؛.
د کوټې د هزاره ټاون د علي آباد سیمې تر ځانمرګي برید وروسته که څه هم لومړی د بلوچستان وزیراعلی ډاکټر مالک بلوڅ د اسلام آباد خپله دوره ختم او د دوشنبې په ورځ بیرته کوټې ته ستون شو. چې د سېشنبې پر ورځ د پاکستان وزیراعظم میانوازشریف هم د يادې صوبې سرښار ته ولاړ، او د امنيت په اړه يې د صوبې له چارواکو سره سره د هزاره و له مشرانو سره هم ولیدل.
میانوازشریف په کوټه کې رسنيو ته وویل ؛نور د ترهګرۍ پېښې په هيڅ صورت زغملی نه شي؛. د بلوچستان په ګورنر هاوس کې تر غونډې وروسته چې د نیشنل ګوند او پښتونخوا ملي عوامي ګوند مشرانو هم په کې ګډون کړی وو، رسنيو ته وویل ؛دوی اوس پرېکړه کړې، چې دا د ترهګرۍ لړۍ به تردې وروسته قبوله نه کړي؛.
؛ موږ دا ورته وویل چې موږ به د پاکستان تر ټولو ښه پولیس آفیسران تاسو ته د کوټې او بلوچستان لپاره درکړو، ډاکټر مالک بلوڅ به ماته يو لیسټ راکړي، او موږ به که خدای کول ښه خلک دلته راولو؛.
وزیراعظم میانوازشریف له رسنوالو سره په خبرو کې وویل، ډېر څه وشوو، لاکن تردې وروسته به د وینې د هر څاڅکي حساب اخیستل کېږي. نوموړي زیاته کړه، کوټه ډېر وړوکی ښار دی، او ولې په دې ښار کې د ترهګرۍ مخه نه شي نیول کېدای؟
؛په بلوچستان چې هدفي وژنې روانې دي. د دې حساب کتاب دې واخیستل شي. او دلته چې د تري تم شويو کسانو ستونځه ده، د هغې حساب کتاب دې هم وشي. ټول د شلو کوڅو او بازارونو ښار دی. آیا ددې حفاظت کول هم کوم مشکل کار دی؟؛.
د پاکستان وزیراعظم په خپلو خبرو کې زیاته کړه، د کوټې ټینګ امنیت او د هزاره ټاون د ځانمرګي برید پلټنې د هيواد د استخباراتو لپاره بايد لومړی قدم شي، چې تر مسوولینو يې ځان ورسوي؛.
د وزیراعظم میانواز شریف په مشرۍ کې د بلوچستان د امنيت په اړه په دې غونډه کې د پاکستان د کورنیو چارو وزیر چودري نثار، د استخباراتي ادارې آيي ايس آيي مشر لیفټينټ جنرل ظهیرالاسلام، د بلوچستان ګورنر محمد خان اڅکزی، وزیراعلی ډاکټر عبدالمالک بلوڅ، د پښتونخوا ملي عوامي ګوند مشر محمود خان اڅکزی، د ملېشه ځواکونو مشر عبیدالله خان خټک، د پولیسو مشر مشتاق سکهيرا او ګڼو نورو لوړپوړو چارواکو ګډون وکړ.
تردې وړاندې د سې شنبې په ورځ د بلوچستان وزیراعلی ډاکټر عبدالمالک بلوڅ د هزاره ټاون د علي آباد سیمې په ځانمرګي برید کې د وژل شويو کسانو له کورنیو سره ولیدل، او هغوي ته يې ډاډ ورکړ، چې نوی حکومت به د ترهګرۍ پر ضد ګامونه پورته کوي، او ترهګر به ځپي.
؛ریاست به خپلې ریاستي زمه وارۍ پوره کوي. او هر هغه قدم به اخلو چې زموږ د ميندو، خويندو، وروڼو وژنه بنده شي. ځکه چې دا يواځې ستاسو نه دي؛.
وزیراعلی بلوچستان د وژل شويو له کورنیو سره په خبرو کې زیاته کړه، د دوی حکومت به يواځې تر خبرو محدوده نه وي، بلکې عملي کار به کوي. او ډېر ژر به د ناامنۍ پېښو ته پای ټکی کښېږدي.
