نن د پاکستان سپریم کورټ د پخوانی پوځي آمر پرویز مشرف په ضد له ملک سره د غدارۍ د کېس اورېدنه تر پنځلسم اپرېل پورې وځنډوله.
بلخوا د کورنيو چارو وفاقي وزارت د سپريم کورټ د هغه حکم پر اساس خپل رپورټ عدالت ته وړاندي کړی چې پکې ويل شوي و چې د مشرف نوم دې په ايګزټ کنټرول لسټ کې واچوي چې له هيواده دباندې نه شي وتلای.
پر پرویز مشرف تورونه دي چې په خپل دور کې یې د پاکستان آيین مات کړی او د سپریم کورټ ججان یی په خپلو کورونو کې نظر بند کړي ول نو ځکه د درخواست ورکونکو په خبره باید د ایین د شپږمې مادې تر مخه د هغه خلاف له ملک سره د غدارۍ مقدمه و چلول شي.
