د لاسرسي ځای

پاکستان دې چېکۍ سیلانیانې راخوشې کړي


د چېک جمهوريت ولسمشر ميلوس زيمن

د چېک جمهوريت ولسمشر ميلوس زيمن


بارکوال مياخېل- کوټه

د چېک جمهوريت ولسمشر ميلوس زيمن خپل پاکستاني سیال آصف علي زرداري ته په استولي یوه ليک کې له نوموړي غوښتي چې په بلوچستان صوبه کې دې د هغوی د هېواد د دوو تښتول شويو نجونو د را خوشې کولو لپاره کوټلي ګامونه واخلي.


د چېک جمهوريت دوې سيلانۍ نجونې د تېرې چارشنبې په ورځ له ايرانه بلوچستان ته را اوښتې وې او له تفتان ښاره کوټې ته را روانې وې چې د کوټې ښار جنوب لوېديځ لور ته په ٥٥٠ کيلوميټرۍ کې د چاغي سيمې په نوکنډي کې وسلوالو له مسافر بسه د وسلو په زور وتښتولې چې حکومت او امنيتي ادارې يې لا هم په موندلو او راخوشي کولو کې ناکامه دي.

چېکۍ سيلانيانې انا همپالووا او انتوني خراتيڅکا

چېکۍ سيلانيانې انا همپالووا او انتوني خراتيڅکا

د چېک جمهوريت د ولسمشر د دفتر وياندې هنا بريانووا په دې اړه رسنيو ته ويلي چې د پاکستان د حکومت هڅو تر اوسه کومه نتيجه نه ده ورکړې.

د تښتول شويو چېکۍ نجونو په اړه د چېک جمهوريت د ولسمشر د دفتر په تازه مالوماتو کې ويل شوي چې هغوی په چېک پوهنتون کې د ارواپوهنې څانګې زدکونکې وې او په رخصتۍ ايران او له هغه ځاى پاکستان ته تللې، چې وسلوالو د وسلو په زور تښتولې دي.

د کوټې ښاروال يا کميشنر قمبر دشتي چې د تښتول شويو چېکۍ نجونو د موندنې لپاره د چاغي نوکنډي سيمې ته تللى، مشال راډيو ته يې وويل چې په چېکۍ نجونو پسې پلټنې يې لا هم هيڅ نتيجه نه ده ورکړې:

"د پلټڼې عمليات مو له بېلابېلو اړخونو دوام لري او له سيمه ييزو استخباراتي مالوماتو هم استفاده کوو، د سيمې مشران هم راسره مرسته کوو، چاغي سيمه ډېره پراخه ده، قريبا پينځه څلوېښت زره مربع کيلوميټره مځکه ده، ځکه نو د پلټنې عمليات پکې څه وخت اخلي، خو تر اوسه پورې مو يې په اړه هيڅ درک نه دى لګولى."

قمبر دشتي وايي، د سيمې مشران يې دا شرم او د خپلو بلوڅي دودونو خلاف ګڼي چې له سيمې يې بهرنۍ ښځينه تښتول شوې دي، ځکه نو هغوى هم ورسره ملګري دي چې دغه تښتول شوې چېکۍ نجونې د وسلوالو له منګولو را خوشي کړي.

چېکۍ سيلانيانې انا همپالووا او انتوني خراتيڅکا لا هم ورکې دي، نه يې چا د تښتونې مسووليت منلى او نه يې د تښتونې په بدل کې کومه غوښتنه شوې ده.
XS
SM
MD
LG