د لاسرسي ځای

په سوات کې پوځي پاټکونه ډېر شوي خلک ترې ستونزې لري


نياز احمد خان مشال ريډيو

د خیبر پښتونخوا په سېلاني سیمه سوات کې يوځل بيا پوځي پاټکونه سيوا شوي او د لټون عملیات روان دي. دغه پاټکونه د سوات لنډاکۍ، مينګوره، چارباغ، خواځه خيله، مټه ، تحصيل کبل او يوشمير نوروسيمو کې لګول شوي چې، پرې تلونکې او راتلونکې موتړې هم پلټل کېږي.

له مشال راډیو سره په خبرو کې د مېنګورې یو ډراېیور محمد نبي وايي، له مېنګورې تر خواځه خيله پورې په شل کلوميټره کې څلور چيک پوستونه لګول شوي دي چې له وجې ی ې دوی د نيم ساعت سفر په دوه او درې ساعتو کې په تيرولو مجبوره دي.



یو بل ډراییور فرمان علي وايي، چې په چارباغ کې له موټرو ښځې هم راکوزول کېږي او پوځیان یې تلاشيانې کوي. کله چې هم څه قسمه پيښه وشي ورسته دغه چيکپوستونه زياتېږي او د لټون دغه لړۍ نوره هم سخته کړل شي چې له وجې یې ځايي ولس له ستونزو سره مخامخ شي.

د سيدوشريف يو مزدور کار مراد علي وايي، چې دوی مزدوري ته روان وي چې د نيم ساعت لاره په څو ساعته کې تيروي چې له وجې یې روزګار ته هم ډير زيان رسېږي.



يو بل مشر سپينږيری ډراېیور رشيد خا ن وايي، چې چيک پوستونه د امنيت له پاره ښه دي خو کله هم چې یو څه وړه لويه پيښه وشي بيا ډير په تفصيل سره لټون او تلاشیانې پېل شي چې له وجې یې د دوی ډېر وخت ضايع کېږي.

له مشال راډيو سره په خبرو کې په سوات کې د پوځ وياند کرنل ذيشان وویل، دوی ته احساس شته چې د خلکو وخت ضایع کېږي خو د خلکو امنیت ساتل هم د دوی ذمه واري ده. د هغه په خبره چې پوځ په تېرو څو ورځو کې وسله وال په نښه کړي او درې وسله وال یې هم وژلي دي.



په سوات کې څو ورځې وړاندې وسله والو په منګلور کې د امن کميټۍ غړۍ سردار احمد په یوه برید کې ووژلی چې وروسته پوځ په ټول سوات کې پاټکونه یا چيک پوستو سېوا کړل او په ځینو سیمو کې یې کور په کور د وسله والو په ضد د لټون عملیات هم دوام لري..

XS
SM
MD
LG