د پاکستان چارواکو د ماشومانو ژغورلو نړيوال سازمان سيو دې چلډرن بهرني کارکوونکي له خپله هيواده باسي. د پنج شنبې په ورځ د سازمان يوه چارواکي وويل، په ظاهره داسې ښکاري چې حکومت دا فيصله د هغو شکونو پر بنياد کړې چې ګواکې خيره موسیسې د هغو امريکايې جاسوسانو مرسته کړې چې د وژل شوي اسامه بن لادن په لټون وو.
د سيو دې چلډرن د اطلاعاتو څانګي مشر غلام قادر وویل، د پاکستان د داخله چارو د وزارت لخوا ورته ويل شوي چې د سازمان شپږ بهرني کارکونکي دې په دوو هفتو کې دننه له هيواده ووځي. دده په وينا د داخله چارو وزارت دوی ته څه وجه نه ده ښودلې.
خبرونه وايې سيو دې چلډرن له ادعا سره سم د پاکستاني ډاکټر شکيل اپريدي چې د اسامه بن لادن د درک لګولو تور پرې لګېږي، د امريکايې جاسوسانو په رابطه کې مرسته کړې وه.
سيو دي چلډرن له تيرو ديرش کلونو راهیسي په پاکستان کې کارکوي او په دغه هېواد کې دوه زره کارکوونکي لري.