د لاسرسي ځای

په پېښور کې چاودنه، ۱۱ وژل شوي دي


په پېښور او شا و خوا سیمو کې وخت تر وخته داسې چاودنې کېږي

په پېښور او شا و خوا سیمو کې وخت تر وخته داسې چاودنې کېږي

شبیر احمد جان

پېښور - د پاکستان خیبر پښتونخوا د پېښور په متنو سیمه کې په یوه موټر کې چاودنه شوې ده چې له امله یې۱۱ تنه وژل شوي او ۱۶ نور ټپیان دي.


دا چاودنه د تېر ماښام تر لمانځه لږه شېبه وړاندې شوې ده.

د پېښې یوه عیني شاهد بنارس خان وویل، په پېښه کې د ده یو شمېر خپلوان وژل شوي دي.

یوه بل کس ارشد مشال راډیو ته وویل، په دې چاودنه کې د ده پلار او د کورنۍ نور درې غړي وژل شوي دي. ده وویل، حکومت باید د داسې پېښو مخنیوی وکړي.

ارشد وویل، وسله والو د دوی سیمه ((ډېره خرابه کړې ده.)) ده زیاته کړه ((الله دې [وسله والو] ته هدایت وکړي او که هدایت یې په قسمت کې نه وي نو خدای دې تباه و برباد کړي چې دا نور مسلمانان ترې بچ شي.))

د خیبر پښتونخوا د اطلاعاتو وزیر میا افتخار حسین مشال راډیو ته وویل، کله چې مستري په موټر کې کار کاوه، نو هغه وخت چاودنه شوې ده. دی وايي، داسې پېښې د حکومت او ولس ((حوصله نه شي ماتېدای.))

د پولیسو له وینا سره سم، په موټر کې شا و خوا ۳۰ کیلو ګرامه چاودونکي توکي ول.

ژوبل شوي کسان د پېښور لېډي ریډنګ روغتون ته وړل شوي ول چې په کې شپږ کورونو ته استولي شوي او ۱۰ نور اوس هم تر درملنې لاندې دي.
XS
SM
MD
LG