د لاسرسي ځای

په پکتیا کې د ناټو بمباري، دوه وسله وال وژل شوي


په پکتیا کې وسله وال وخت تر وخته حملې کوي

په پکتیا کې وسله وال وخت تر وخته حملې کوي

نقیب الله متونوال، مشال راډیو

ګردېز -
د افغانستان د پکتیا ولایت ځايي چارواکي وايي، تېر مازیګر (د مې څلورمه) شپږ بجې د زرمت ولسوالۍ د مکرم خېلو په سیمه کې د ناټو په هوايي برید کې دوه تنه ماین ښخوونکي وژل شوي دي.

د زرمت ولسوال ګلاب شاه د پېښې تاييد کوي او زياتوي، تېر مازیګر د دې ولسوالۍ په مکرم خېلو سیمه کې د دولت د وسله والو مخالفینو ١٢کسیز ګروپ لیدل شوی، چې وروسته د نړیوالو ځواکونو له خوا پرې هوایي برید وشو، چې په برید کې دوه تنه ماین ښخوونکي وژل شوي او پاتې ۱۰ تنه يې تښتیدلي دي.

د زرمت ولسوال ګلاب شاه په خبره، چې د وژل شویو ماین ښخوونکو جسدونه امنیتي ځواکونو ولسوالۍ ته لېږدولي او وروسته به مرکز ګردېز ته یوړل شي.

هغه زياتوي، وژل کسان د دې ولسوالۍ د سهاکو سیمې اوسېدونکي دي.

تر اوسه په دې اړه وسله والو مخالفینو څه نه دي ویلي.

دا په داسې حال کې ده چې د تېرې پنج شنبې پر ورځ هم، په همدې ولسوالۍ کې د ماین جوړولو د چاودنې پر مهال د شپږو تنو وسله والو مخالفینو د وژل کېدو او د دوو د ژوبلېدو، خبر ورکړل شوی وو.
XS
SM
MD
LG