هارون باچا، مشال راډیو
واشنګټن - فرانس پریس اژانس لیکي، د امریکا یوه عدالت ۲۴ کالن پاکستاني تبعه جوبیر احمد ته، له لښکر طیبه سره د مادي مرستو د برابرولو په تور، د ۱۲ کالونو د بند سزا اورولې ده.
ویل شوي، نوموړی به له زندانه تر راوتو وروسته هم د نورو پینځو کالونو له پاره د امریکايي ادارو تر څار لاندې وي.
له لښکر طیبه سره تړاو
د احمد په اړه راپورونه وايي دی د خپلې کورنۍ له غړو سره يو ځای په ۲۰۰۷ ز کال کې امريکا ته داخل شو.
د دې هیواد د تحقيقاتو فيډرالي ادارې (ايف بي آی) د نوموړي له لښکر طيبه سره د اړیکو په باب د مالوماتو د تر لاسه کولو وروسته په ۲۰۰۹ ز کال کې د ده پر ضد پلټنې پيل کړې.
د امريکا د انصاف وزارت ويلي، جوبير احمد، چې د ورجينيا ايالت په ووډ برېج نومې ښار کې اوسېده، ته ياده سزا لښکر طيبه ته د خلکو د استخدامولو د هڅو له پاره په ده د لګول شويو تورونو، تر ثابتېدو وروسته، اورول شوې ده.
پر یوټیوب د حافظ سعید لپاره کمپاین
احمد د امريکايي عدالت مخې ته منلې چې ده د لښکر طيبه د مشر حافظ سعيد له زوی طلحه سعيد سره رابطه کړې وه، چې هم د هغه پر لارښوونه يې د ۲۰۱۰ ز کال په سيپټمبر کې يوه ویډيو جوړه او په يوټيوب خپره کړه. یوټیوب یوه ووبپاڼه ده چې د نړۍ له ګوټ، ګوټه خلک پر خپلې ویډیو ګانې خپروي.
په دې ویډيو کې حافظ سعيد او د يادې ډلې له خوا په کشمير کې شوي بريدونه ښودل شوي ول.
فرانس پريس د يوه امريکايي څارنوال نيل مېک برايډ له قوله ليکي: ((موږ د ترهګرو له خوا، د دې له پاره چې خپل پيغام د ګردې نړۍ خلکو ته ورسوي، د يوټيوب په څېر د ټولنيزو ووبپاڼو د زيات کارولو شاهدان اوسېدلي يو.))
نوموړی زياتوي، احمد د لښکر طيبه سخت دريځه او له تشدده ډکو عزايمو ته کلکه ژمنتيا درلوده چې همدغه افراطي نظريات يې د انټرنیټ له لارې خپرول او د يادې ډلې له پاره يې د پيسو غونډولو کمپاين (یا کیمپېن) چلولو.
ممبۍ بریدونه لښکر طیبه کړي ول
راپورونه وايي، لښکر طيبه د پاکستان له جاسوسي ادارو سره تاريخي اړيکي لري.
د امريکا حکومت بيا ياده ډله له ۲۰۰۱ ز کال راهیسې د بهرنيو ترهګرو ډلو په لېسټ کې اچولې ده.
په عين حال کې، امريکا او هند دواړه هیوادونه وايي چې پر ممبۍ ښار د ۲۰۰۸ ز کال ترهګر بريدونه، چې په کې ۱۶۰ تنه ووژل شول، لښکر طيبه کړي ول.
د همدې تورونو په ترځ کې د امريکا حکومت د روانې مياشتې په لومړيو ورځو کې د دې ډلې د بنسټ ايښوونکي مشر په توګه د پېژندل شوي حافظ محمد سعيد پر سر د ۱۰ ميليونو ډالرو د انعام اعلان وکړ.
د امريکا حکومت ويلي، د دې انعام تر شا يې مقصد هغه مالومات لاس ته راوړل دي چې به د امريکا دننه یا په بل يو ځای کې، د نوموړي د محاکمه کولو لار هواره کړي.
امريکا په عين وخت کې دا هم واضح کړې چې د حافظ سعيد پر سر د جايزې د اعلانولو هدف يې پر پاکستان فشار راوړل نه دي، بلکه دا چې د نوموړي په نيولو او عدالت ته په مخامخ کولو کې د دغه هېواد له حکومت سره مرسته وشي.
پاکستان بيا د امريکا د دې اقدام په ځواب کې، چې دا مهال يې ورسره اړيکي هم ويل کېږي ډېر باوري نه دي، ويلي د حافظ سعيد پر ضد د قانوني کار روايۍ له پاره ورسره پاخه ثبوتونه نشته، او که چا سره وي، نو ورته دې حواله کړي.