د لاسرسي ځای

پاکستان نه تقسیموو. ولسمشر اوباما


د امریکا ولسمشر بارک اوباما

د امریکا ولسمشر بارک اوباما

د امريکا د ولسمشر اوباما ادارې دا خبره رد کړې، چې امريکا پاکستان تقسیمول غواړي.

په بلوچستان کې د بيليدو لپاره له اوو کلونو راهيسې وسله واله مبارزه روانه ده او اوس د امريکا په کانګرس کې د بهرنيو اړيکو د کميټې مشر وړانديز کړی دی، چې بلوچستان دې خپلواک هېواد شي.

د پاکستان د لویې صوبې د بيليدو پارونکې خبرې چې يوه امريکايي سېنېټر کړې دي، په پاکستان کې غوغا جوړه کړې ده.

د دې مسلې له ياديدو سره هغه ديپلوماتيکي هڅې چې د واشنګتن او اسلام اباد تر منځ د ښو اړيکو لپاره روانې دي، پيچلې شوې دي.

تيره جمعه د ریپبلیکن ګوند سېنېټر ډانا رورابکر وويل، چې د بلوچستان خلک حق لري چې د ملي حاکميت څښتنان وي او ځان ته خپلواک هېواد ولري.

د ګڼو امريکايي رسنیو په وينا کانګرس ته د رورابکر د وړاندې شوي قرارداد د برياليتوب چانس لږ دي.

په پاکستان کې هم يو شمير سياستوال ورته نظر لري. په اسلام اباد کې د سياسي چارو څيړونکي ډاکټر همايون خان وايي:

« ګومان نه کوم چې کانګرس به دا ومني چې د بلوچستان مساله دې رااوچته شي او که چيرته داسې وشو بيا به د پاکستان لپاره ګرانه شي او دا خو د پاکستان په کورنۍ مسالې کې لاسوهنه ده »

د دې سربيره چې په امريکا او پاکستان کې کانګرس ته د رورابکر د قرارداد د برياليتوب چانس لږ تر سترګو کيږي، بيا هم پاکستاني ديپلوماتانو او رسنيو سخت عکس العمل څرګند کړي دي.

د پاکستان ولسمشر وويل چې دا يو بريد دی چې د پاکستان پر ځمکنۍ بشپړتیا شوی ، په واشنګتن کې د اسلام اباد نوې سفيرې شيري رحمان بيا خبرداری ورکړ چې له دې سره به د پاکستان او امريکا پر اړيکو خورا ناوړه اغيز پريوزي.

پاکستاني رسنيو بيا سېنېټر رورابکر تورن کړ چې غواړي په دې ډول پاکستان د بالکان هيوادونو په څير وويشي.

د امريکا د ولسمشر بارک اوباما ادارې دا تورونه رد کړې دي.

د پاکستان انديښنې د نيويارک ټايمز ورځپاڼې د ايشا پسفيک خپرونې په وينا تر ډيره په بلوچستان کې د شخړو له امله دي، چې له څو کلونو راهيسې د خپلواکۍ لپاره روانې دي.

هلته پوځيانو له بشري حقونو پراخې سرغړونې کړې دي. البته په پاکستان کې د امريکا ضد احساسات هم غښتلي دي.

د بارک اوباما ادارې د سېنېټر رورابکر له وړانديز سره موافق نظر نه دی ورکړي.

په اسلام اباد کې د امريکا سفارت په يوه بيان کې وويل چې امريکا د پاکستان ارضي تماميت ته احترام کوي او دا د امريکا د حکومت تګلاره نه ده چې د بلوچستان د خپلواکۍ ملاتړ وکړي.

رورابکر چې په کانګرس کې د بهرنيو اړيکو د کميټو مشري کوي په وروستيو کې په کانګرس کې د پاکستان پرضد تيري کوونکي دريځ خپل کړي دي.

هغه د سې شنبې په ورځ وويل چې پاکستان په دوامداره ډول د امريکا دوه مخې دښمني خپله کړې ده.

پروسږکال په مې مياشت کې په ايبټ اباد کې د القاعده شبکې د مشر اسامه به لادن د وژل کېدو وروسته ، رورابکر وړانديز وکړ، چې امريکا دې په پاکستان خپلې ټولې مرستې بندې کړي.
XS
SM
MD
LG