د پاکستان پخواني وزیراعظم وویل: ((د بلوچستان چي کوم ځوانان دې او له دوي سره کومي ډګرۍ دي. د هغوي د پوښتني هیڅ څوک نشته. دا صوبه له ګڼو طبعي شتمنیو ډکه ده. که د دې صوبې له همدې طبعي شتمنیو څخه هم کار واخیستل شي نو دا صوبه به د پاکستان په څلورو صوبو کې اول لمبر صوبه وي.))
بلوڅ ملتپال او د جمهوري وطن ګوند مشر نوابزاده طلال بګټي د ن لیګ د مشر د ټولو خبرو ملاتړ وکړ، او د بلوچستان له ټولو سیاسي ګوندونو یې غوښتنه وکړه چې په دې کنفرانس کي دي ګډون وکړي.
نواز شریف خبري غونډې ته وینا کوي.
نوابزاده طلال بګټی د دې کنفرانس په اړه وايي:
((په دې کنفرانس کې باید ټول ګډون وکړي، خو که په دې کنفرانس کې پيپلز ګوند هم شرکت وکړي نو زما شک دی چې بیا به ډېر خلک رانشي. او دا به ووايي چي پيپلز ګوند دې لومړی په بلوچستان کې عملیات بند کړي. نور ګوندونو ته زه هر کلی کوم. کم از کم موږ خو به په دې کنفرانس کې خامخا ګډون کوو.))
په بلوچستان صوبه کې که يو پلو بلوڅ د خپلوحقوقو غوښتنه کوي نو بل پلو د پښتونخوا ملي عوامي ګوند عبدالرحیم زیارتوال بیا وايي، د دې صوبې له پښتنو سره هم زیاتی شوی او خپل حقوق نه دي ورکړل شوي.
عبدالرحیم زیارتوال له مشال سره په خبرو کې وویل:
((په دې صوبه دوه لوي قامونه میشت دي. بلوڅ او پښتون. خو که وګورې نو ددې صوبې وزیراعلی ، ګورنر او ټول سرکاري چارواکي بلوڅان دي او پښتنو ته هیڅ هم نه دي ورکړل شوي.))
سره له دې چې ځينې بلوڅ ملتپالو په وسله واله مبارزه لاس پوري کړی. او په بیا بیا يې ویلي له ازادۍ ها خوا ته به په هیڅ شي راضي نشي. خو نوابزاده طلال بګټی وايي حکومت دې د دوی لومړني ځېنې شرطونه ومني، ((خبرو ته يې زه راولم!))
