د لاسرسي ځای

نيل آرمسټرانګ له سپوږمۍ تر افغانستانه


نیل آرمسټرانګ په ۱۹۶۹ م کال پر سپوږمۍ خپل پل ږدی چې د آپولو ۱۱م په مرسته وخوت

نیل آرمسټرانګ په ۱۹۶۹ م کال پر سپوږمۍ خپل پل ږدی چې د آپولو ۱۱م په مرسته وخوت



نيل آرمسټرانګ روانه اونۍ د خپلو نورو دوو هغو ملګرو سره په ګډه د افغانستان پر خاوره قدم کښېښودی چي څه باندي څلوېښت کاله وړاندي سپوږمۍ ته ختلي وو.

د دوی د سفر موخه د افغانستان د نوي هوايي ځواک غړو ته روحيه ورکول او د دوی مورال لوړول و چي د هيواد په ساتنه او بيا رغونه کي برخه اخلي.

نوموړي د افغانستان د هوايي ځواک له هغه ځواني ډلي سره په کابل کي ليده کاته وکړه چي د ناټو تر څارني لاندي يې روزنه کېده. د ناټو لخوا په يو بيان کي د افغان هوايي ځواک روزنه تر لاسه کونکو ځوانانو ته د آرمسټرانګ هغه خبره شوې ده چي په هر کار کي جذبه ډېره مهمه وي.

آرمسټرانګ له هغي ځواني ډلي سره وليدل چي ښځو يې تور حجاب کړی و او د نارينوو يې زرغونې خولۍ پر سر وې او په يوه تانده جذبه د هيواد د خدمت لپاره راغونډ شوي وو. نوموړي دوی ته په کتو سره وويل، د دغه ځواني ډلې جذبه او خوشالي د ډاډ وړ ده.

په افغانستان کي عسکرۍ ته نيول شوو د نوو ځوانانو او عام ولس ملاتړ تر لاسه کول په داسي هيواد کي له مشکل سره مخامخ دي چي يوې خوا ته طالب ياغيان دي او بلي خوا ته د لسو کلونو راهيسي جنګ روان دی.

له امريکايي پوځيانو سره له هيواده بهر د آرمسټرانګ غوندي خلګو ليدل د معمول خبره ده خو له افغان ځواکونو لپاره دا يوه نوې خبره ده.
کيڼ لوري ته نیل آرمسټرانګ له خپلو نورو ملګرو سره، په ۱۹۶۹م کال

۸۱ کلن امريکايي نيل آرمسټرانګ هغه وخت نړی هک پک حيرانه کړه کله چي نوموړی په ۱۹۶۹ م کال کي سپوږمۍ ته وختی. له ده سره د افغانستان د سفر پر مهال ۸۳ کلن جيم لوول هم و چي په ۱۹۷۰م کال کي سپوږمۍ ته ختلی و. د دې سربېره ۷۷ کلن ګېنې سېرنن هم د دوی ملګری و چي هغه هم سپوږمې ته ختلی دی.

له دغو سپوږمۍ ختونکو سره د ليدو پر مهال تر روزني لاندي يو افغان ځوان لېفټيننټ خان آغا غزنوي وويل، زما لپاره د ډيري خوشالۍ ځای دی چي زه له دې ډول سترو کسانو سره وينم او دوی زما پوښتني ځوابوي.

ناټو بيړه کوي چي د افغانستان غريب او اکثره نالوستی پوليس او ملي اردو تر هغه وخته وروزي چې د ۲۰۱۴م کال تر پايه د دغه هيواد د امنيت مسيوليت افغان ځواکونو ته وسپاري.
XS
SM
MD
LG