په ۲۰۰۲ز کال کې په پاکستان کې د وژلي امریکايي خبریال ډینییل پرل مور او پلار د پاکستان له سپریم کورټه غوښتنه کړې چې د نوموړي په وژنه د تورنو کسانو خوشې کولو په اړه دې د سیند های کورټ پرېکړه وځنډوي.
د نوموړي پلار جوډیا او مور روت پرل د مې پر دویمه په سپریم کورټ کې درخواست دایر کړ.
دا تر هغې وروسته ده چې د اپرېل پر دویمه سیند های کورټ د ډینییل پرل د وژنې په تور د نیولي احمد عمر سعید شیخ د مرګ سزا ختمه کړه او د درو نورو تورنو کسانو د خوشې کولو امر یې ورکړ.
ډینییل پرل څوک وو؟
های کورټ په خپله فیصله کې شیخ یوازې د پرل په تښتونه مجرم وباله او ورته یې د اووه کاله بند سزا واوروله.
خو د ډینییل پرل مور و پلار په خپل غوښتنلیک کې ویلي چې سیند های کورټ د وړاندې شویو شهادتونو سم جاج نه دی اخیستی.
د پاکستان حکومت هم ویلي ول چې د پرېکړې ضد سپریم کورټ ته درخواست کوي.
د وال سټریټ ژورنال خبریال پرل د ۲۰۰۲ز کال په فبرورۍ کې په کراچۍ کې تر تښتول کېدو شاوخوا یوه میاشت وروسته وژل شوی وو.
د اپرېل پر درېیمه د جنوبي او مرکزي اسیا چارو لپاره د امریکا د بهرنیو چارو وزارت مرستیالې الېس وېلز په یوه بیان کې د سیند های کورټ فیصله وغندله خو د پرېکړې ضد یې د پاکستاني حکومت د اپیل کولو اعلان هرکلی وکړ.
د فېسبوک تبصرې